Alfred må sikkert vere den lukkelegaste kosebamsen i verda! For ikkje berre får han vere med skuleungane heim, nei han får vere med Kurt´n ut i Nordsjøen og!

Og kven er så denne heldig skapningen? På Bulandet skule har 1-3 klasse sin eigen kosebamse som får vere med på det meste. Ein dag skjer det utenkelege: Kurt Rutledal som til vanleg jobbar i oljen, kjem innom skulen for å ordne noko datakrøll. Då er det ein som undrar om ikkje det hadde vore kjekt for han Alfred og fått seg ein tur ut i Nordsjøen og? Det synest ungane er ein god idé! Og ikke lenge etter er Alfred og Kurt´n på veg!

I spesialsydde oljeklede og utstyrt med både vernebriller og hjelm, drar Alfred i helikopter ut i Nordsjøen der han og Kurt´n går om bord i oljeinstallasjonen Åsgård A. I løpet av ei veke får Alfred vere med på det meste, frå å entre livbåtane, sjekke brannutstyret, inspisere byssa, ta seg ein treningsøkt i trimrommet, sjå korleis tankbåtane kjem og laster olje, få seg ein helsesjekk og ikkje minst: kjøpe Bamsemums som alle i klassen skal få når han kjem heim att og skal fortelje om eventyret han har opplevd der ute i Nordsjøen!

Alfred Offshore er ei bok til å lære av! Men kanskje vert forfattaren litt for ivrig med å få vist frem alle bileta sine, og kanskje glemmer han av og til at målgruppa er ungar og ikkje ungdom eller vaksne- Litt for mange foto, og litt for vanskeleg fagspråk til trass: Alfred Offshore tar oss med på ei spennande reise ut i ei verd dei fleste av oss ellers ikkje har tilgjenge til!

Skrive av: Anne Elisabeth

Ramna-Floke av Sylvelin Vatle

Korleis var det å dra ut i det ukjende for å finne øya nokon hadde sagt skulle ligge der vest i havet ein stad? Kvifor måtte ein dra og kva vart resultatet av reisa?

I denne romanen for ungdom møter vi Ingeborg, søstrene hennar og far hennar: Ramna-Floke, som er nemt i den islandske Landnåmaboka frå 1100-talet. For å redda seg unna Harald Hårfagre forlet dei Vestlandet saman med tenarar, treller og buskap, og gjev seg i veg over havet. Først mot Færøyane og så vidare mot landet dei kallar Island då det flyt så mykje is i fjordane der. Landet finn far til Ingeborg ved hjelp av dei tre ravnane om bord, difor tilnavnet Ramna-Floke!

Gjennom auga til Ingeborg, får lesaren del i den farlege seilasen. Vi ser korleis det gamle møter det nye: ikkje berre hesten men og ei ung jente må ofre livet for at Volva og gudane skal vert nøgde og hjelpe dei på ferda! Men er det slik det bør vere, undrar Ingeborg- Då den vesle søstera døyr under ein stopp på Hjaltland, må likbålet lagast i stand, og då dei kjem til Færøyane ventar giftarmål mellom Tora, den andre søsteren til Ingeborg og den mykje eldre Kalf Torsteinsson-

Møtet med sjølve Island vert skremmande. Is og kulde men og uforklårleg eld og varme gjer dei redde! Er det heksane som koker mat i digre kjeler der borti gropane? Og kven er dei høge skapningane med krumme ryggar og blåsande hårtuster- er dei ånder? Eller vetter og skrømt?

Vanskar av mange slag møter båtfolket før dei kan bli ein del av det nye landet. Men trass i alt det fælslege som skjer, er det likevel trua på ein betre framtid som preger boka. Kjærleiken som litt etter litt veks frem mellom Ingeborg og den mystiske ungguten Faxe frå Suderøyane, det nye landet med alt viltet i fjellet, fisken i havet, dei varme kjeldene og det yrande fuglelivet! Ramna-Floke er ein bok både å læra av og å bli fascinert av! Og med dei fargerike tresnittliknande illustrasjonane til Sveinbjörg Hallgrimsdóttir, vert lesinga og ei estetisk oppleving!

Skrive av: Anne Elisabeth

Solveig

Solveig

Skrive av Bente D.

James er 11 år gamal. I byrjinga av boka bur han saman med mora og veslesøstera Lauren. James kjem stadig borti trøbbel. Ein dag toppar det seg, og han vert utvist frå skulen samstundes som han får dei verste bøllene på skulen etter seg. Same ettermiddag finn han og Lauren mora død, og neste morgon vaknar dei på ein nedsliten barneheim.
På barneheimen fortset problema å dukke opp. James vil ikkje verke feig, og får komme inn i klikken til dei store tøffe ungdomane på barneheimen. Dei lurer han til å gå inn på eit alkoholutsal og stele øl – noko som gjer at han får ein kraftig advarsel frå politiet. Dagen etter vaknar han på ein ny barneheim. Denne er fin, med basseng, tennisbane og meir til. James har kome til Cherub og dei vil at han skal bu der og jobbe for dei. Cherub ser etter barn som James – intelligente barn som stadig hamnar i trøbbel, og som ikkje kan bu med foreldra. James takkar ja, og vi får følgje han gjennom tøffe opptaksprøver og grunnopplæring.

Til slutt får vi og vere med James på sitt første oppdrag – det store, vanskelege oppdraget dei har spart til han fordi han passar perfekt: Han skal bu i eit hippiekollektiv der han skal spionere på menneske som etterretningstenesta meiner er med i terroristgruppa ”Redd jorda”.Oppdraget vert kjekt og spennande, men etter kvart farleg og. Her vert det slåssing, knivar og skytevåpen med meir, og denne lesaren fekk til fulle tilfredsstilt sitt spenningsbehov med denne boka.

Dette er første bok i serien Cherub på 12 bøker.

I den andre boka i serien, Kokainkongen,  skal James bli ven med sønen til ein mann som har gjort det stort innan narkotika. På denne måten skal han hjelpe etterretningstenesta med å skaffe bevis mot faren.   Han klarar å bli så god ven med guten at det endar opp med at han får bli med dei på ferie, og dei vert bestevener. Dette gjer at James etter kvart slit litt med lojaliteten. Bør han, som besteven, nytte kunnskapane sine til å få venens far arrestert? Då vil jo venen bli utan far… ? Kva James kjem fram til får du finne ut sjølv, men det eg kan fortelje er at ein narkokonge ikkje berre har vener, og undervegs kjem James opp i fleire farlege situasjonar. Det heile vert veldig spennande.

I bok tre, flukta, blir  James sett i fengsel på celle saman med dei verste av dei verste. Ikkje fordi han har gjort noko gale, men for å bli ven med sonen til ei ettersøkt kvinne. Planen er at James skal hjelpe denne sonen til å rømme frå fengselet, og på denne måten finne ut kor mora er i verda. Etterretningstenesta klarar nemleg ikkje å finne henne så dei kan arrestere ho. Av dei oppdraga James har vore med på så langt, vert nok dette det farlegaste. Det er nemleg ikkje dei snillaste gutane i verda som er på denne cella. Spennande lesning, med andre ord.

Eg likte desse bøkene veldig godt, og gler meg til dei neste 9 i denne serien. Spennande bøker for ungdommar!

Anne-Marie

 Frosken og den vide verda handlar om det store forlokkande eventyret på den eine sida og den trygge, gode heimen på den andre. Når Frosken har masa seg til å vere med på tur, lengtar han heim, og når han endeleg er heime igjen, fortel han om alt det fantastiske dei har opplevd ute i den vide verda.

Frosken og fuglesongen handlar om døden.

Skrive av Bente D.

Skrive av Tone

Historia er eit fint bilde på korleis det kan opplevast å ikkje forstå eit språk. Den fortel om den botnlause einsemda ein då kan kjenna, men og om at ein kan finna nøkkelen til forståing gjennom til dømes kjærleiken. Og gjennom å bruka språket ved å skriva for eksempel. Brevet frå havet har lite tekst, og er skriven med eit enkelt språk.

Akin Duzakin sine illustrasjonar er like poetiske og drøymande som teksten. Med tynne blyantstrekar og duse fargar viser dei ensomheten til fiskaren. Detaljane er få, men tydelege: fiskaren, båten, havet, garnet. Ein fin detalj i historia er då fiskaren dreg til biblioteket og mellom anna søkjer på verdsveven. Biblioteket er jo ein samlingsplass for mange som søkjer etter å forstå noko, og kanskje spesielt for framandspråklege. Duzakin har her teikna fiskaren sin båt som ligg ved havna utanfor ein storby. Fiskaren går altså ganske langt for å finna forståing. Eg trur nok denne biletboka vil passa betre for ungdom og vaksne enn for små barn. Den poetiske teksten og dei vakre, vare illustrasjonane vil truleg gå litt over hovudet på barn. Det same vil kan henda historia gjera, med tema som vaksne sin einsemd og kjærleik. Men teksten er enkel å forstå for meir vaksne lesarar som er nye i det norske språket, og dei vil nok kunna kjenna seg igjen i og nyta Brevet frå havet. Og viss de lurer: historia ender godt. Prinsessa på holmen kjem inn i huset til fiskaren.

Skrive av Tone

Egil Hyldmo har tidlegare gitt ut fleire dyrebøker for barn, både om ulv,bjørn og jerv. No har han kome med ei ny flott fagbok for barn og unge. Denne gongen om moskusen.I dei tre første kapitla får vi først eit historisk tilbakeblikk  som fortel om mammut og moskusfe, om kvifor dei forsvann og kvar dei greidde å overleva tross varmare klima. Vi får så vita korleis moskusen vart sett ut på Dovre i 30-åra, at dei vart utrydda under krigen,men atnye vart sette ut og at desse no er ein livskraftig stamme som lever lenger, er tyngre og føder oftare enn slektningen på Grønland og i Canada. Boka har svært mykje fakta, av og til i overkant med tal. Men her er mykje interessante opplysningar. T.der det interessant å lesa om flokksamarbeidet,korleis dyra hjelper kvarandre både for å stå i mot angrep frå andre dyr og menneske og  for å klare seg i uver. Faktisk er desse dyra ganske intelligente. Boka har bilete på alle sider,nokre sider har heilsides bilete. Her er mange nærbilete slik at vi får eit godt inntrykk av dette dyret som vi elles ikkje kjem innpå. I tillegg har kvart kapittel ei historie som heiter “Mitt moskus-møte”. Her er fleire ganske dramatiske historier, t.d. om politikvinna som meiner ho sette personleg rekord på 100 m etter å ha hatt ein moskusokse i hælane,eller ei dame som måtte reddast ut frå hytta si med helikopter etter at eit dyr ikkje villa flytta seg frå hytteveggen på Dovre. Kvart kapittel har òg ein boks som heiter “ Å-ja?”. Her er ulikt faktastoff gjerne i tilknytning til dyret, t. d. “Moskus er ikkje eit dyr, men eit luktstoff som det blir laga godlukt av.Det blir laga av sekretet som finst i moskussekken som ligg ved kjønnsorganet til moskushjorten. “ Boka er berekna frå 3.- 4.klasse og oppover. Eg trur nok her er i overkant mykje både fakta og lange tekstar for denne aldersgruppa,men bileta og tekstane til dei gjer nok at mange vil kunna ha glede av boka. Her er godt med avsnittsoverskrifter som òg gjer stoffet lettare tilgjengeleg.  Ei bok å anbefala.

Skrive av Kjellaug